ผญาอวยพรปีใหม่ (โดย อีเกียแดง แห่งรัตติกาล)

พี่น้องเอ๊ย ขอให้สุขขีหมั่น สัมพันธ์แก่นแฟนผญา
ห้าเก้าลาสิว่ากลาย หกสิบหมายหล่ะเเทนซ้อน
ขอน้อมพรเป็นกลอนเกี้ยว ผญาเทียวขานก่อ
ขอยกยอต่อเศียรเกล้า ขึ้นมาเว้าเล่าส่งคำ

โอน้อ คุณพระพุทธเลิศล้ำ ให้นำส่งหล่ะคงหมาย เด้อครับ
ทุกข์ภัยกลายในปลายปี อย่าได้มีมาใกล้
แนวสิ่งได๋ไปขวงค้าง ให้เปิดทางย่างก้าวใหม่
ให้ซื่นใสหัวใจแพร้ว คือดังแก้ว..แนวค่างาม

ให้เย็นใสได้จั่งน้ำ สุขสว่างดั่งจันทร์ฉาย เด้อ
อันตรายให้กลายหนี ความดีคองคอยปองกุ้ม
พี่น้องซุมตุ้มเอื้อ คอยเจือจุล..หนุนก่อ
เงินเต็มถงจนล้นห่อ สุขเพียงพอต่อใจเจ้า เด้อแฟนเค้าเล่าสุคน

ภาพบทผญา แอดมิน อีเกียแดง แห่งรัตติกาล
ส่งท้ายปีเก่าต้อนรับปีใหม่ครับผม สุขสดใสสดชื่นทุกคนเด้อครับ
๓๑/๑๒/๒๕๕๙

โอน้อ ปีใหม่มาว่าจั้นจ้อ ยืนรอข่าวลูกสาวเดียว นี่แหล๊ว
ตากะเทียวส่องหา อิหล่านาง..คนโก้
เจ้าสิโงคืนบ้าน ฝากฮอยคำให้จำก่อ
อีหลีบ่หล่ะน้อเจ้า คือคำเว้าเล่าบ้อนาง

อิหล่าเอ๊ย แม่สิหาแนวอ้าง เตรียมรับ..ฮับทางขวัญ
หากเจ้าหวนคืนนา แม่สิหาว่าแนวต้อน
อ่อมปูนาอีกปลาข่อน หาส่อนมาว่าหมกจี่ ซั้นแหล๊ว
สิ่งได๋ดีมีให้เจ้า หาเอาไว้ถ่าใส่ภา

ลูกเอ๊ย เติมแฮงใจในวันล้า กลับบ้านป่าหัวนาดอน เด้อคำ
กลับคืนคอนนอนเฮือนหลัง ฟังลมหนาวดั่งคราวกี้
ข้าวหลามมีแม่เตรียมพร้อม ข้าวใหม่หอมพร้อมเตรียมจี่
แม่คอยนางอยู่ทางพี้ ปีใหม่ฟ้าวให้ต่าวมา เด้อหล่า
.....................................................................................
กลับมาอิหล่าบักหล่า กลับมาบ้านยามปีใหม่เด้อ แม่สิพาไปขุดกะปูมาอ่อมพ้อมขัวบักหอยมาไว้ให้ทางเจ้าเล่าอิ่มทรวง แท้แหล๊ว
ทักทายแฟนเพจครับผม สายลมหนาวมาอ้อนดั่งเสียงวอนอ้อนคืนถิ่น ให้เจ้ายิลถิ่นดอนบ้าง อย่าลืมร้างจนห่างเลือน เด้อครับ 

ภาพและบทผญา@ อีเกียแดง แห่งรัตติกาล